നിലാവ്പോലെ

ഓര്‍മ്മക്കുളം

2011-10-28T15:44:00.001+04:00

മഹത്തായ പ്രണയം

2011-06-14T20:50:00.001+04:00

വിട

2010-12-04T11:33:00.006+04:00

കഴിഞ്ഞ ആറുകൊല്ലമായി
അഭയം തന്ന നഗരമേ ,
നിനക്ക് വിട !
ചിതലരിച്ച നാടകങ്ങള്‍ക്കും ,
കൂട്ടികൊടുപ്പിനും ,
പ്രോത്സാഹനം നല്‍കിയവളെ ,
നിനക്ക് വിട !
എന്നെ കോവണിയാക്കിയവരെ
നീ കണ്ടില്ലെന്നു നടിച്ചു .
അവര്‍ക്ക് നല്‍കിയതോ..?
എന്നിട്ടും , നിന്റെയോരം ചേര്‍ന്നു നടന്നത്
നീ നല്‍കിയ അന്നത്തെയോര്‍ത്താണ്..
ഇന്നെനിക്ക് വയ്യ !
നിന്റെ യോനിയിലെ ചൂട്
താങ്ങാനും ,
കോവണിയാവാനും
കരുത്തില്ല എനിക്ക് .
മുതുകിലെ
ചുവടുകള്‍ തീര്‍ത്ത തഴമ്പില്‍ നിന്നും
കല്‍ക്കരി ഒഴുകുന്നുണ്ട് ആത്മാവിലേക്ക് ...
കാലമോ നോക്കികുത്തിയാകുന്നു
കവിത മുടി കൊത്തി തിന്നുന്നു...
തല അച്ഛന്റെ കൈയൊപ്പാകുന്നു..
അങ്ങകലെ ,
അമ്മയുടെ പാദത്തിനു മീതെയുള്ള
സ്വര്‍ഗത്തിന്റെ അടിത്തറയുടെ
മണ്ണും ഒലിച്ചുപോകുന്നു...
അമ്മയുടെ പാദംതേടിയാത്രയാകുന്നു...
തെറ്റുകള്‍ പൊറുത്താലും നിങ്ങള്‍.........!

വയ്യെന്റെ നഗരമേ , വിട !

ചിലര്‍

2010-11-27T22:42:00.004+04:00

ചിലര്‍
അങ്ങനെയാണ്.

ദു:ഖം വരുമ്പോള്‍
സത്രമാക്കി കളയും നമ്മെ .
നിശ്വാസകാറ്റിനാല്‍
പുളകിതരാവും അവര്‍ .
സഹായവും തോളിലേറ്റി
സഞ്ചരിക്കും വിദൂരതയിലേക്ക്...
സത്രം അടഞ്ഞുകിടക്കുന്നതും ,
വിങ്ങുന്നതും അവര്‍ സന്തോഷിക്കുമ്പോഴാണ്.
ഇപ്പോള്‍ ഒരു മുട്ട് കേള്‍ക്കുന്നുണ്ടോ
വാതില്‍ക്കല്‍ ?

ഉറപ്പിക്കാം ,
ദു:ഖം ആരെയോ അതിന്റെ ചുടുവിരല്‍ കൊണ്ട്
തൊട്ടിരിക്കാം....
*****************
മലയാളകവിതയില്‍ പ്രസിദ്ധീകരിച്ചത്

ഭൂമിയിലേയും, കാറ്റിലേയും തന്ത്രികള്‍

2010-11-18T21:14:00.005+04:00

(Courtesy :Google )
ഭൂമിയിലേയും, കാറ്റിലേയും തന്ത്രികള്‍
മരത്തെ തലോടി മടങ്ങുന്ന
നദിതന്‍ തന്ത്രികളും ചേര്‍ന്നലവിടം
മാധുര്യത്തിന്‍ സംഗീത സദസ്സ് .
പ്രണയോന്‍മാദത്തില്‍ , അലഞ്ഞവര്‍ക്കല്ലോ
നദിക്ക് മീതെ നില്‍ക്കും സംഗീതം .
അവനെ മൂടുന്നുവോ വാടിയ പൂക്കള്‍ ,
മുടിയാകെ ഇരുണ്ട ഇലകളും .
സംഗീതത്തിന്‍ ചായ്‌വിന്റെ തലപ്പിലേക്ക്
എല്ലാമൊഴുകുന്നു മൃദുവായ് ...
സംഗീതോപകരണത്തിന്‍ മീതെയെന്തിനോ -
വേണ്ടി പരതുന്നൂ വിരലുകള്‍ ....

സിഗരറ്റ്

2010-11-14T22:52:00.003+04:00

സിഗരറ്റ്
ഒരു പ്രതീകം .
വലിക്കുന്നവന്‍
വിഡ്ഢിയല്ല.
വലി കഴിഞ്ഞ്
ചെരിപ്പിനാല്‍
മെതിക്കപ്പെടുന്നവന്‍
പിന്നെയാര്?

അക്ഷരജാലകം

2010-11-08T19:21:00.000+04:00

വാക്കുകള്‍

2010-10-11T13:44:00.003+04:00

നിന്നില്‍ ഞാന്‍ വിശ്വസിക്കുന്നു

2010-10-01T14:17:00.066+04:00

(Courtesy :Google)

നിന്നിലും , നിന്റെ വിധിയിലും ഞാന്‍

വിശ്വാസമര്‍പ്പിച്ചു നില്‍പ്പുവല്ലോ.
ഉത്തരാധുനികതയുടെ വക്താക്കള്‍
നിങ്ങളാണെന്ന് കരുതട്ടെ ഞാനും .

കൃതജ്ഞതയുടെ സമ്മാനം പോലെ
അമേരിക്കതന്‍ മടിത്തട്ടിലായ് ,
അഭിമാനത്തോടെ മയങ്ങുവനായ്
നിങ്ങള്‍ക്കിന്നു കഴിയുന്നതെന്തന്നാല്‍
ഗീതത്താലും , പ്രവചനത്താലും,
പൂര്‍വ്വപിതാക്കള്‍തന്‍ സ്വപ്നങ്ങളില്‍ -
നിന്നും ലഭിച്ച വരദാനമായപൈതൃക സ്വത്തിനാലെന്ന് കരുതിടട്ടെ ....

ലബനിസിന്റെ കുന്നില്‍ നിന്നും
വേരു പിഴുതെടുത്തൊരു യുവവൃക്ഷം
വളര്‍ന്ന് പന്തലിച്ച് വേരു പടര്‍ത്തി
ഫലസമൃദ്ധമായി പുഷ്പിക്കനായ്
നില്‍ക്കുന്നുവെന്നീ മഹത്തായ ദേശത്തിന്റെ
സ്ഥാപകരോട് പറയുവാന്‍ നിങ്ങള്‍ക്കു കഴിയുമെന്
പ്രതീക്ഷിച്ചീടട്ടെ ഞാനുമല്ലോ .

നസ്രേത്തുവിന്റെ യേശുനാഥന്‍
സംസാരിച്ചപ്പോള്‍ നിങ്ങള്‍തന്‍ ചുണ്ടില്‍
സ്പര്‍ശിച്ചനുഗ്രഹിച്ചെന്നും ,
എഴുതിയപ്പോള്‍ വഴികാട്ടിയായി നിങ്ങള്‍തന്‍ കരങ്ങള്‍ക്കെന്നുമേ !
നിങ്ങള്‍ പറഞ്ഞു കുറിച്ചതുമായയെല്ലാകാര്യങ്ങളിലും ഞാന്‍
പിന്താങ്ങിയെന്ന് എബ്രഹാം ലിങ്കനോടായ് നിങ്ങള്‍
പറയുമെന്ന് ഞാന്‍ വിശ്വസിച്ചീടുന്നു....

എന്റെ സിരകളിലോടുംരക്തംജ്ഞാനികളായ വൃദ്ധരുടേയും ,
കവികളുടേയുമാണെന്നും ,
നിങ്ങളിലേക്ക് വരികയും കൂട്ടുകയുമെന്നതെന്റെ മോഹം
എന്നാലോ, വെറും കൈയാല്‍ ഞാന്‍ വരില്ലയെന
എമേഴ്സണോടും, വിറ്റ്മാനോടും, ജയിംസിനോടും പറഞ്ഞു കൊള്ളേണം

നിങ്ങളുടെ പിതാക്കന്‍മാരെല്ലാം
ഈ തീരം തേടി വന്നതു പോലും
പണമുണ്ടാക്കാന്‍ മാത്രമല്ലോ .
ബുദ്ധിശക്തിയാലും, കഠിനാദ്ധ്വാനത്താലും
സമ്പത്തുണ്ടാക്കുവാന്‍ നിങ്ങളിവിടെ
പിറന്നതെന്നു ഞാന്‍ കരുതീടുന്നൂ...

നല്ല ജനതയെ വാര്‍ത്തെടുക്കാന്‍ നിങ്ങളി-
ലൂടെ കഴിയുകയുള്ളൂ......

ഒരു നല്ല പൌരനെന്നാല്‍ ആരായിരിക്കണം?

മറ്റുള്ളോര്‍തന്‍ അവകാശങ്ങള്‍
സ്വന്തമെന്നുറപ്പിക്കും മുന്നേ, യത്-
അംഗീകരിക്കേണ്ടതും നിങ്ങളുടെ സ്വന്ത-
മെന്ന ബോധത്തിലാവണം .

കര്‍മ്മ ചിന്തകളില്‍ സ്വതന്ത്രരാകുവിന്‍
എന്നാലറിയേണം മറ്റുള്ളോര്‍തന്‍ സ്വാതന്ത്ര്യം
നിങ്ങള്‍തന്‍ സ്വാതന്ത്ര്യത്തില്‍ വിഷയീഭവിക്കുന്നതും...

മനോഹാരിതവും , പ്രയോജനവുമായ സ്വകരവിരുതിനാല്‍ രൂപപ്പെടുത്തേണം നിങ്ങളിത് .
മറ്റുള്ളോര്‍തന്‍ സ്നേഹവിശ്വാസത്തില്‍ -
സൃഷ്ടിച്ചതിനെയാദരിക്കുകയും വേണമൊപ്പം .

സമ്പത്തുണ്ടാവട്ടെ അദ്ധ്വാനത്താല്‍,
അദ്ധ്വാനം കൊണ്ടതൊന്നുമാത്രം !
വരവിനേക്കാള്‍ കുറച്ച് നിങ്ങള്‍ ചിലവഴിച്ചീടേണം ;
നിങ്ങളില്ലെങ്കിലും കുട്ടികളന്യര്‍തന്‍
സഹായം തേടാതിരിപ്പതിനായ്......

ആന്റിയോക്കിലും, സിദോനിലും, ടൈറിലും,
ബിബ്ളസിലും, ഡമാസ്കസിലുമായ് പടുത്തുയര്‍ത്തിയ ജനതയുടെ
പിന്‍തുടര്‍ച്ചക്കാരന്‍ ഞാനെന്ന്
സാന്‍ഫ്രാന്‍സിസ്കോയുടെയും, ചിക്കാഗോയുടേയും ,
വാഷിംഗ്ടണിന്റേയും , ന്യൂയോര്‍ക്കിന്റേയും
ഗോപുരങ്ങള്‍ക്കുമുന്നില്‍ നിന്ന് നെഞ്ച് വിരിച്ച്
പറഞ്ഞീടേണം നിങ്ങള്‍ .

അമേരിക്കനാവുകയെന്നഭിമാനിക്കെതന്നെ,
അഭിമാനിക്കേണം നിങ്ങളും സ്വയം .
നിങ്ങളൂടെ പിതാക്കന്‍മാരും, മാതാക്കന്‍മാരും ,
ദൈവത്തിന്റെ കാരുണ്യം ചൊരിയും കരങ്ങളില്‍ നിന്നും ,
വാഴ്‌ത്തപ്പെട്ട പ്രവാചകര്‍തന്‍
പുണ്യ ഭൂവില്‍ നിന്നും വന്നതിനാല്‍ !!

.

എന്നെ ആലിംഗനം ചെയ്യാത്ത അച്ഛന്‍...

2010-08-30T16:31:00.001+04:00

അന്ധ വിശ്വാസം

2010-08-22T22:04:00.019+04:00

(Courtesy :Google)

മാമന്റെ മകന്‍ മിലിന്ദ്
മരിച്ചത് യാദൃശ്ചികം .
അജ്ഞാതമായിരുന്നു നിദാനം
മെഡിക്കല്‍ സയന്‍സിനും .
മരിപ്പിനു ചെന്നയെന്നെ ചൂണ്ടി -
യുച്ചത്തില്‍ കരഞ്ഞു പറഞ്ഞു മാമി :
''ഇവളാണെന്റെ കുഞ്ഞിനെ കൊന്നത് ;
             കൂടോത്രം ചെയ്ത്........''
നിരവധി കണ്ണുകള്‍ ചാട്ടുളിയായി -
യെന്നില്‍ പതിക്കും നേരം
ഞാനോതരിച്ചു നിന്നു പ്രതിമപോലെ....
എന്നിലെ വാക്കുകള്‍ ഉണങ്ങി
             ആവിയായ്....
ഇരുട്ട് കാവിമുണ്ടുടുത്ത്
കണ്ണുകള്‍ കൂട്ടി കെട്ടിയവരുടെ
അവര്‍ക്കെന്നെ കാണാനായില്ല .
ഞാനോ ,യുരുകിമണ്‍പലക-
           യോട് ചേര്‍ന്നു .
**********************************************
Ezhuth online മാഗസിനില്‍ പ്രസിദ്ധീകരിച്ചത്

സ്വര്‍ഗത്തിലേക്ക് വീണ്ടും

2010-08-20T17:11:00.002+04:00

(Courtesy : Google)

സ്വര്‍ഗത്തിലേക്ക് ഒരിക്കല്‍
കൂടെ മടങ്ങവേണം ,
പുലരി ചുംബിച്ച് അലിയിച്ച
മഞ്ഞിന്റെ കൈയോട് കൈചേര്‍ത്ത് .

സ്വര്‍ഗത്തിലേക്ക് തിരിക്കവേണം
വീണ്ടുമെനിക്ക് ,
മലഞ്ചരിവില്‍ തത്തികളിച്ച
മേഘമുദ്രയും നമ്മള്‍ രണ്ടും ചേര്‍ന്ന് .

സ്വര്‍ഗത്തിലേക്ക് മടങ്ങണം വീണ്ടുമെനിക്ക്...

ഈ മനോഹര ജീവിത അവസാനയാത്രയില്‍
തിരികെപോയി ചൊല്ലും ഞാന്‍ :
''എത്ര സുരഭിലമായിരുന്നതെന്നോ.''

തിരിച്ചറിവ്

2010-08-17T23:15:00.005+04:00

(Courtesy : Google )
ചങ്ക് പറിച്ചു -

കാണിച്ചതാണവള്‍ക്ക് .
ചെമ്പരത്തിയല്ലെ,യിതെന്നു
പറഞ്ഞു കളഞ്ഞവള്‍ .

ഒരിക്കല്‍,
മറ്റൊരുവന്റെ വലം കൈയില്‍
തന്റെ ഇടം കൈ മുറുകേ പിടിച്ച്
ഇടവഴിയിലൂടെ നടന്നൂ പോയവള്‍...
ചങ്കിലെ ചെമ്പരത്തിയോ
കാലമെടുത്ത്
ചെവിയില്‍ വെച്ചു തന്നു മെല്ലെ...

അതിനുശേഷമത്രേ,
ജീവിതത്തിന്റെ നിറം
ചെമ്പരത്തിയെന്നു
തിരിച്ചറിഞ്ഞത്.

നിന്നോട് , ചിലത്...

2010-08-05T23:03:00.018+04:00

നിന്നോട് ചോദിക്കാതെ-
യാണു ഞാന്‍ പ്രണയിച്ചത്.
പറയാതെയാണു നീ
പടിയിറങ്ങിപോയതും...

(കടപ്പാട് :ഗൂഗിള്‍ ഒണ്ടിക്കാവ്)

നിന്നെ കാത്തു ഞാന്‍ നിന്ന
ഒണ്ടിക്കാവിലെ ആല്‍ മരം
വിരഹത്തിന്റെ മന്ദിപ്പില്‍
പെയ്തലക്കുന്നു...

ആലിലകളില്‍ കാറ്റ്
ശോകഗാനത്തിന്‍
ഇടക്ക വായിക്കുന്നു...
നീ അന്നെനിക്കായ് ചൊല്ലിയ
കവിതയും ,
ഒണ്ടിക്കാവും
ഓര്‍മ്മകല്ലുകള്‍ക്കു കീഴെ
ഞെരുങ്ങുന്ന നേരം
മനസൊരു പാഴ്‌മരുഭൂമിയാകുന്നു.
ഇവിടെയോ ,യിനിയൊരു പ്രണയം
പൂക്കില്ലൊരുനാളും .
പ്രതീക്ഷയുടെ പുല്ലണിഞ്ഞ പാത
കരിഞ്ഞ് മണ്‍പലകയോട്
ചേര്‍ന്നിരിക്കുന്നു.
കണ്ണുനീരിന്റെ ഒഴുക്കില്‍
വളക്കൂറു്‌ ഒലിച്ചു പോയെ--
ങ്ങോ മറഞ്ഞു.
കാറ്റിലാടുന്നൊരുണക്ക ചില്ല-
മാത്രമവശേഷിക്കുന്നിപ്പോഴും...

ഏകാന്തതയുടെ വാത്മീകത്തിലുള്‍-
വലിഞ്ഞ്
കവിതയെ ഭാണ്ഡത്തിലാക്കി
ഒണ്ടിക്കാവിലെമണ്ണില്‍
നിന്റെ പാദമുദ്ര പതിഞ്ഞിടത്ത്
മുഖം ചായ്ച് ഞാനൊന്നു-
റങ്ങട്ടേ.......?

സഖീ ,
ആകെ ഞാനോ തളര്‍ന്നിരിക്കുന്നു.....

(കടപ്പാട് :ഗൂഗിള്‍ )

അപരിചിതന്‍

2010-07-13T15:40:00.003+04:00

പിതൃസ്മൃതി

2010-06-20T21:57:00.006+04:00

മൃത്യുവിന്റെ സൌന്ദര്യം

2010-04-13T17:30:00.010+04:00

ഖലീല്‍ ജിബ്രാന്‍

(Picture courtesy : Google)
ഞാനൊന്നുറങ്ങട്ടെ ,
പ്രേമ ലഹരിയിലാണെന്‍
ആത്മാവ്.
ഞാനൊന്നു വിശ്രമിക്കട്ടെ,
ദാനം കിട്ടിയ ദിനരാത്രങ്ങളിലാ-
ണെന്റെ ചേതന.
സാമ്പ്രാണിതിരി പുകക്കുക
കിടക്കക്ക്ചുറ്റും,മെഴുകുതിരികള്‍
കത്തിച്ചു വെച്ചാലും !
വിതറുക മുല്ലയുടേയും , റോസയുടേയും
ഇതളുകളാലെന്റെ ഗാത്രത്തിലുടനീളം
സുഗന്ധതൈലത്താല്‍
കോതിയൊതുക്കുകയെന്‍ തലമുടി
വാസനതൈലം തൂവുക
കാലടികളില്‍.
മൃത്യുവതിന്റെ കരങ്ങളിലെഴുതിയത്
എന്റെ തിരുനെറ്റിയില്‍ വായിച്ചാലും !
നിദ്രയുടെ വിശുദ്ധകരങ്ങളില്‍
ഞാനൊന്നു മയങ്ങട്ടെ
തുറന്ന മിഴികളാകമാനം
തളര്‍ന്നിരിക്കുന്നു
വെള്ളി തന്ത്രി കെട്ടിയ
പൊന്‍വീണമീട്ടി സാന്ത്വനമേ-
കീടേണമെന്റെ പ്രാണന്.
വരളുന്ന ഹൃദയത്തിന്‍‌ ചുറ്റും
മൂടുപടം നെയ്യുക പൊന്‍വീണയാല്‍ !
പ്രത്യാശയുടെ ഉദയമെന്‍
കണ്ണുകളില്‍ ദര്‍ശിച്ച്
കഴിഞ്ഞ കാലത്തെ കുറിച്ച്
നിങ്ങള്‍ പാടുവിന്‍...
ഹൃദയവശിഷ്ടങ്ങള്‍ക്ക് മീതെ
നിലകൊള്ളുന്നൊരു മാന്ത്രികപൊരു-
ളൊരു മൃദു മഞ്ചം .

പ്രിയസ്നേഹിതരേ ,
കണ്ണീര്‍ തുടക്കുവിന്‍
പൂക്കളെപോല്‍ തലകള്‍
ഉയര്‍ത്തുവിന്‍
ഉദയത്തെ വരവേല്‍ക്കുവാന്‍
ശിരോലങ്കാരമുയര്‍ത്തിപിടിച്ചാലും.
കാണുക പ്രകാശസ്തൂപമാം
മരണമെന്ന വധുവിനെ
അനന്തതക്കുമെന്റെ കിടക്കയ്ക്കു-
മിടയില്‍ നിലയുറപ്പിച്ചത് .
വെള്ള ചിറകടി മര്‍മ്മരത്താലെന്നെ-
യവള്‍ മാടി വിളിക്കുന്നത്
ശ്വാസമടക്കി നിങ്ങള്‍ കേട്ടാലും !
വേര്‍പാടിനെ ക്ഷണിക്കാ-
നടുത്തു വന്നു കൊള്ളണം
പുഞ്ചിരിയുതിര്‍ക്കുന്ന അധരങ്ങനളാ-
ലെന്റെകണ്ണുകള്‍ സ്പര്‍ശിച്ചീടേണം.
കുട്ടികള്‍തന്‍ മൃദു റോസാവിരലുകളാ-
ലെന്റെ കരംഗ്രഹിച്ചോട്ടെ.
വൃദ്ധര്‍‍തന്‍ ഞരമ്പെഴും കൈകളെന്റെ
തിരുനെറ്റിയില്‍ വെച്ചനുഗ്രഹിച്ചീടേണം .
കന്യകമാര്‍ ദൈവത്തിന്റെ നിഴല്‍
അരികില്‍ വന്നെന്‍
കണ്ണില്‍ ദര്‍ശിച്ചിടും നേരം
എന്റെ ശ്വാസത്തിനൊപ്പമൊഴുകി
നീങ്ങുടുമവന്റെ മാറ്റൊലി
കേള്‍ക്കുമാറാകേണം .

2.ആരോഹണം

ഒരു കുന്നിന്റെ കൊടുമുടി കടന്നു ഞാന്‍ ,
അതിര്‍വരമ്പുകളില്ലാത്ത സ്വാതന്ത്ര്യവും
നീലനക്ഷത്രഖചിതമായ ആകാശത്തില്‍
ഉയര്‍ന്നു പറക്കുകാണെന്‍ആത്മാവ് .
ദൂരെയാണു്‌ കൂട്ടരെ ,
അതിവിദൂരതയിലാണു്‌ ഞാന്‍ .

മേഘങ്ങള്‍ കുന്നുകളെയെന്‍
കണ്ണില്‍ നിന്നും മറച്ചു പിടിക്കുന്നു .
നിശബ്ധവാരിധിയാല്‍ താഴ്വരകളാ -
കമാനം നിറഞ്ഞു തുളുമ്പിയല്ലോ...
വീടുകളും ,വീഥികളും

വിസ്മൃതിയുടെ കരങ്ങള്‍

വിഴുങ്ങും നേരം
വെളുത്ത ശൂന്യതക്കപ്പുറം
വയലുകളും ,പുല്‍ക്കാടുകളും
മറഞ്ഞ് പോകുന്നു.
വസന്തമേഘങ്ങള്‍പോലെയും
മെഴുകുതിരിശോഭപോല്‍മഞ്ഞയായും ,
അസ്തമയസൂര്യന്റെചുവന്നവെളിച്ചം -
പോലെയും കാണുന്നത് .
നീരൊഴുക്കുകള്‍തന്‍ സങ്കീര്‍ത്തനങ്ങളും,
തിരമാലയുടെ ഗീതങ്ങളും
അലയടിക്കുന്നു .
ജനകൂട്ടത്തിന്റെ മാറ്റൊലി
നിശബ്ദതയിലേക്ക് ലയിച്ചു ചേര്‍ന്നു

അനശ്വരസംഗീതം
ശൂന്യതയെന്ന് ഞാന്‍ ശ്രവിക്കേ ,
സ്വരചേര്‍ച്ചയിലല്ലോ
പ്രാണന്റെമോഹങ്ങള്‍ .

3. അവശിഷ്ടങ്ങള്‍

മോചിപ്പിക്കുകയെന്നെ
ശ്വേത വസ്ത്രത്തിന്റെ മൂടുപടത്തില്‍ നിന്നും .
പുതപ്പിക്കുക റോസയുടെയും ,
ലില്ലിയുടേയും ഇതളുകളാല്‍ !
ദന്തനിര്‍മ്മിത ഖബറില്‍നിന്ന്
ശരീരമെടുത്താലും
ശയിക്കട്ടെയത് ഓറഞ്ചുതോടിനാല്‍
തീര്‍ത്ത തലയിണയില്‍ .
എന്നെയോര്‍ത്തു കരയരുതാരും ,
മെന്നാലോയൌവനോഷ്മള
ഗീതങ്ങളാലപിച്ചാലും !
കണ്ണീര്‍പൊഴിക്കരുതെന്നില്‍
എന്നാലോ ,വീഞ്ഞുയന്ത്രത്തേയും
കൊയ്ത്തിനേയുംപറ്റി പാടുക .
മരണവേദനയാല്‍
പശ്ചാത്തപിക്കരുത്
എന്നാലോ ,വരക്കുക
സന്തോഷ്മള ചിത്രങ്ങളെന്റെ
മുഖത്ത് നിങ്ങളുടെ വിരലുകളാല്‍ !
ദുആ-മന്ത്രോച്ചാരണങ്ങളാല്‍
കാറ്റിന്റെ പ്രശാന്തത ഭഞ്ജിക്കരുത് .
എന്നാലോ,യെന്നെ ഹ്ര്യദയത്തിലേറ്റി
നിത്യജീവന്റെ ഗീതങ്ങളാലപിക്കൂ...
വിലപിക്കരുത് കറുത്തവസ്ത്ര-
മണിഞ്ഞെന്നെയോര്‍ത്ത് .
എന്നാലോ ,വര്‍ണ്ണവേഷമണി-
ഞെന്നില്‍ഘോഷിച്ചാലും !
നിങ്ങളുടെ ഹ്ര്യദയങ്ങളില്‍
നെടുവീര്‍പ്പുകളരുതെന്റെ
വേര്‍പാട് ഓര്‍ത്ത്..
കണ്ണുകളടച്ച് നിങ്ങള്‍
നിത്യതയെന്റെ കണ്ണില്‍
ദര്‍ശിച്ചാലും
സൌഹ്ര്യദ ചുമലുകളെന്നെ
വഹിച്ചീടേണം
മന്ദം നടക്കവേണം
വന്യമായ കാട്ടിലേക്ക്....
ഇലക്കൂട്ടങ്ങള്‍ക്ക് മീതെ
വെച്ചാലുമെന്നെ .
മുല്ലയുടേയും ,ലില്ലിയുടേയും
വിത്തുകള്‍ കൂട്ടി കുഴച്ച
മൃദു മണ്‍തരികളാലെന്നെ മൂടണം .
അവയെന്നില്‍ വളര്‍ന്നു പന്തലിച്ചിടും കാലം
വന്നണയുന്ന വഴിയാത്രികരെന്റെ
ഹൃദയസുഗന്ധം ശ്വസിച്ചു കൊള്‍കട്ടെ

ഇളംകാറ്റില്‍ പോകും പായ്കപ്പല്‍
യാത്രികനത് ആശ്വാസവുമേകിടട്ടെ .

വിട്ടകലുകയെന്നെ , വിട്ടകലുക കൂട്ടരെ
നിശബ്ദകാലടികളാല്‍ !
വന്യമായ താഴ്വരയിലൂടെ
നിശബ്ദമായി സഞ്ചരിച്ചാലും !

ദൈവത്തിലേക്കെന്നെ
പറഞ്ഞയച്ച്
ബദാം മരത്തിന്റേയും ,ആപ്പിള്‍ മരത്തിന്റേയും
പൂക്കള്‍ തീര്ത്ത കുടക്കും
മന്ദമാരുതന്റെ ദ്രുത ചലനത്തിനും
കീഴെ നിങ്ങള്‍പിരിഞ്ഞുപോയാലും
മന്ദം മന്ദം......
സന്തോഷമാം ഭവങ്ങളിലേക്ക്
മടങ്ങവേണം നിങ്ങള്‍
മരണത്തിന് നിങ്ങളില്‍ നിന്നെന്നെ
വേര്‍പ്പെടുത്താന്‍ കഴിയാത്തത്
കണ്ടെത്തണം .

വിട്ടകലുകയീ സ്ഥലി
നിങ്ങളിവിടെ കണ്ട പൊരുള്‍
നശ്വരലോകത്തില്‍ നിന്നെത്ര
ദൂരെയാണു്‌ കൂട്ടരേ....

വിട്ടകലുകയെന്നെ......
****************************
ആംഗലേയം ഇവിടെ വായിക്കാം

വെളിപാട്

2010-03-21T22:02:00.003+04:00

അന്നൊരു വെള്ളിയാഴ്ച

'സുബൈറു'മൊന്നിച്ചു
പറഞ്ഞവസാനിപ്പിക്കാത്ത
വിഷയമല്ലാത്തതെന്‍
സ്വപ്നത്തില്‍ കണ്ടു.

കേട്ടറിഞ്ഞിട്ടില്ലാത്തയിടം

കണ്ടറിഞ്ഞിട്ടില്ലാത്തയിടം.
ഝഷം1പോലെയവിടെ-
യൊഴുകി നീങ്ങും
മര്‍ത്യരോട്
ദരം 2വഹിക്കുന്നൊരെന്‍
ദേഹിയെറിഞ്ഞൊരു
ചോദ്യ ശരം :
''എന്താണപകടം പിണഞ്ഞതെന്‍

സോദരേ....?

അറിയില്ല ഞങ്ങള്‍ക്ക്
ന്യായാധിപന്‍
കരുതിവച്ചൊരാ
ശിക്ഷനടപടികള്‍...
പേരു്‌ വിളിക്കായ്
കാത്തു നില്‍ക്കുന്നോര്‍
ഞങ്ങള്‍...

ക്ഷിപ്രമെങ്ങ് നിന്നോ
സ്വര്‍ണ്ണപ്രകാശമരിച്ചുകയറി
അതില്‍ നിന്നും
മുഴങ്ങികേട്ടുച്ചത്തില്‍:
'സോണ........ ഗോപിനാഥ് ....''
സ്വപ്നംമുറിഞ്ഞു
ഞെട്ടിയുണരവേ ,
സ്വേദ3ത്താല്‍ പൊതിയപ്പെട്ടന്‍ ദേഹം
കണ്ടു.

വര്‍ദ്ധിച്ച ഹ്ര്യദയസ്പന്ദനങ്ങള്‍
തട്ടി പ്രതിധ്വനിച്ചെന്‍
ഹ്ര്യദന്ത ഭിത്തിയില്‍.....
----------------------------------------
1ഝഷം -മത്സ്യം
2ദരം -ഭയം

3-സ്വേദം -വിയര്‍പ്പ്

ലഹരി

2010-03-19T22:31:00.003+04:00

ശ്രീ യൂസഫലി പാടുന്നു :
'തിരികേ
പ്രേമിക്കത്തോളെ
പ്രേമിപ്പോനെ
പ്രേമത്തിന്റെ ലഹരിയറിയൂ '
അനുഭവതാലത്തിലെടുത്തു-
വെച്ചാ പദങ്ങളെ

പ്രണയ വാളിനാല്‍
രണ്ടായി പകുത്ത
ഹ്ര്യത്തും പ്രതിഷ്ഠിച്ചു .
അലയുന്നൂ ഞാനും ,മെന്റെ
ലഹരിയും .

കവിതയാല്‍

'കാലശേയം'1 തയ്യാറാക്കി
ലഹരിയമര്‍ത്താന്‍ .

എരിയുന്ന ഹ്ര്യദയം
മുളകിനു്‌പകരമായ് നേദിച്ചു.
പേരുംപിച്ചിചീന്തിയിട്ടു ;
കറിവേപ്പിലക്ക് പകരം.
കണ്ണീരും ചാലിച്ചു ;
ഉപ്പിനു്‌പകരം .

പിന്നെ ,
തൂലികയാലിളക്കിയൊരൊറ്റ -
മോന്തലിലെന്റെ
ലഹരിയും ,പ്രണയവുമടങ്ങി-
യെന്നന്നേക്കുമായ്....
*******************************
1.കാലശേയം -മോര്

മീന്‍നാറ്റം (മലയാളി)

2010-03-17T22:46:00.000+04:00

അച്ഛന്‍ പഴേ മേശമേല്‍
വച്ചു പോയ ബീഡിയൊഴിച്ചൊന്നുമേ ,
കട്ടിട്ടില്ലിതുവരെ ഞാന്‍ .
രാത്രിയില്‍ ടാറ്റ വെളിവഴി
കടന്നു പോകും
വഴിയാത്രക്കാരോട്
കത്തികാട്ടി
കാശ് ചോദിച്ചിട്ടില്ല .

യൂദാസിന്റെ കറുത്ത കുപ്പായ-
മിണങ്ങുമോയെന്നിട്ടു-
നോക്കിയിട്ടില്ല. .

എങ്കിലും ,

ജീവിതമെന്ന
ദുസഹതയാം
ചോദ്യചിഹ്നം
താടി തടവി
മുന്നില്‍ വളഞ്ഞു നിന്നപ്പോള്‍
മീന്‍കച്ചോടത്തിലൂടെ-
യുത്തരമോതി ഞാനും .

കവലകള്‍ തോറും കറങ്ങി,
കാറി കൊണ്ട് കൂകി :
'നല്ല പിടക്കണമീനേ..
നാലെണ്ണം പത്ത് രൂപക്ക്
വായോ........'

എന്നിട്ടും ,
സല്‍പേരൊന്നും കിട്ടിയില്ല ;
പേരുദോഷമൊഴിച്ച്.

ഒടുവില്‍ ,
മീന്‍കച്ചോടം വിട്ടു;
മുരളി ഗള്‍ഫില്‍
വിസ തരപ്പെടുത്തിയപ്പോള്‍ .

പിന്നെ ,
പലപ്പോഴായ് കിട്ടിയ
ലീവുകളില്‍
പുത്തന്‍ മണം പൂശി
നാട്ടില്‍ ചെത്തി നടന്നെങ്കിലും ,
വ്യവസ്ഥിതിയുടെ
വായില്‍ നിന്നു വന്ന
വായ്‌നാറ്റം(മീന്‍നാറ്റം )
പുതുമണത്തെയാക്രമിക്കു-
ന്നുണ്ടിപ്പോഴും..

പിടിച്ചു നിര്‍ത്തലിന്റെ കത്തുകള്‍

2010-03-12T16:02:00.002+04:00

രണ്ട് കൊല്ലം കഴിഞ്ഞ്

മോന്‍ മടങ്ങുക തിരികേ-
യെന്ന് പറഞ്ഞിട്ടിപ്പോള്‍
ആറ്കൊല്ലം കഴിഞ്ഞതറിഞ്ഞീല.
ഇതിനിടയില്‍ വന്ന
യാചേന രൂപേണയുള്ള
'പിടിച്ചു നില്‍ക്കണേ'- യെന്ന
സ്നേഹാക്ഷരങ്ങള്‍ (അതിഥികള്‍) .
വീണ്ടും വീണ്ടുമെന്നെ
പിടിച്ചു നിറുത്തീടുമ്പോ-
ളൊന്നു ചോദിച്ചോട്ടെ
അല്ലയോ ! വ്യവസ്ഥിതി :
'പിടിച്ചു നില്‍ക്കേണ്ടതെവിടെ-
യെന്ന് ചൊല്‍ക വേണം '

ബസ്സിലെങ്കില്‍ കമ്പിയുണ്ട് ,
മരത്തിലെങ്കിലോ , ശിഖരമുണ്ട്.
മണല്‍ക്കാട്ടിലോ............?

ആകാശമാകെ പരതി നോക്കി
അദ്ര്യശ്യ ശിഖരങ്ങള്‍
ചികഞ്ഞു നോക്കി .

കത്തുകള്‍ വന്നു മുറക്ക് വീണ്ടും
ആവര്‍ത്തനങ്ങള്‍
പുളിച്ചു തികട്ടി .
കത്ത് പൊട്ടിക്കയില്ല ഇന്നിനി ഞാന്‍
മുങ്ങുമാരോടും പറയാതൊരുനാള്‍.
ഞാന്‍ നീയാകുമവേള
നിനക്കും കിട്ടും കത്തുകള്‍ ..
കൂട്ടുകാരാ ,
നീയെവിടെപിടിച്ചാണ്‍ നില്‍ക്കുക-
യെന്ന്ചൊല്ലുകവേണമവരോടായ്....

കവിതകളാലൊരു ചിത

2010-03-08T14:07:00.003+04:00

അയച്ചതിലും വേഗംമടങ്ങി ,
പരിഭവം പേറിയെത്തിയ കവിതകള്‍ ,
മടങ്ങിയെത്താതെ
ഏതോ ചവറുകൂനയില്‍
ജന്‍മം പാഴായ
കവിതയുടെ പകര്‍പ്പുകളും
എടുത്ത്
ഈന്തപനയുടെ
കാല്‍ചുവട്ടില്‍
കൂമ്പാരമാക്കി
ചിതയൊരുക്കി .
തീ നാളം നോക്കി നില്‍ക്കവേ ,
സര്‍ഗവേദനയാല്‍
കണ്ണീര്‍ പൊഴിഞ്ഞപ്പോള്‍
'എന്താണു്‌ പൊട്ടാ '
കടലാസ് കത്തിച്ചിട്ട്
കരയുന്നതെന്ന് ചോദിച്ച നൌഷാദെ..
സര്‍ഗവേദനയെന്തെന്നറിയാത്ത
കുട്ടികളുണ്ടാവാത്ത
നിന്നോടെന്തു പറയാനാണ് ഞാന്‍.
ചിതയെരിഞ്ഞടങ്ങിയപ്പോള്‍
കാറ്റ് കണ്ണീര്‍ തുടച്ചപ്പോള്‍
അവസാനത്തെ ചാരവും പേറി
യാത്ര പറഞ്ഞപ്പോള്‍
ഈത്തപഴം പൊഴിഞ്ഞു
വീണെനിക്ക് ബഹുദൂരം
പിന്നിലായ്....

രണ്ട് രാജ്യങ്ങള്‍ ലിഫ്റ്റില്‍ കണ്ടു മുട്ടിയപ്പോള്‍

2010-03-03T22:38:00.001+04:00

രണ്ട് രാജ്യങ്ങളൊരിക്കല്‍

കണ്ടുമുട്ടുന്നാ-
പഴയ പൊടി പിടിച്ച
ലിഫ്റ്റില്‍ .

പരിചിതപ്പെടലിന്റെയാമുഖ-
മെന്നോണം
ചോദ്യം വാതില്‍ തുറന്നു
വന്നൊന്നാമനില്‍ നിന്നും :
'പേരെന്താണ്...? '
രണ്ടാമന്‍
ചിരിയില്‍
വാല്‍സല്യത്തിന്‍ വറ്റ് കുഴച്ച്
പറഞ്ഞു പോല്‍ തന്റെ പേര്.
ഒന്നാമന്റെ മുഖത്തപ്പോള്‍

വിദ്വേഷത്തിന്റെയൊരു
കാര്‍മേഘമെങ്ങോ
നിന്നെത്തി നിന്നു.
വീണ്ടും ചോദ്യം :
'മുറിച്ചിട്ടുണ്ടോ...? '
രണ്ടാമന്റെ മുഖത്ത്
നിലാവുണ്ടിപ്പോള്‍ .
അയാള്‍ പോക്കറ്റില്‍ നിന്നും
പേരെടുത്ത് നല്‍കി
പറഞ്ഞു :
''ഇതാ മുറിച്ചേല്‍പ്പിക്ക
തിരികേ വേഗം ''

അപ്പോള്‍ ലിഫ്റ്റിലെ
ബള്‍ബിലെ
ഫിലമെന്റ് നാഡി
പൊട്ടി പോയി.
ഇപ്പോള്‍ ഇരുട്ടാണ്
ലിഫ്റ്റിനകം .
ഒന്നാമന്‍ ഇരുട്ടിനെ
കെട്ടി പുണര്‍ന്നു നിന്നു.
രണ്ടാമനോടി പുറത്തേക്ക്

പുറത്ത് നല്ല വെളിച്ചം ,
കാറ്റ് , കലപില ശബ്ദങ്ങള്‍ ..
ഈന്തപന വീഥിക്കരുകില്‍
നട്ടു പിടിപ്പിച്ച
നിരവധി ചെടികള്‍ ,
നിരവധി പൂക്കള്‍
അവനോരോന്നും
മണത്തു നോക്കി
അതേ !യെല്ലാത്തിനും
അതിന്റേതായ നല്ല മണം .
അവന്‍ തിരിച്ചു നടന്നു
ലിഫ്റ്റ് ലക്ഷ്യമാക്കി
അപ്പോളവിടെ
ലിഫ്റ്റിനു പകരം
ഇരുട്ട് കട്ട പിടിച്ച
ചെങ്കല്ല്.

ക്രൈസിസ്

2010-02-24T12:42:00.000+04:00

മറ്റൊരു

ഖാണ്ടവ ദാഹത്തിന്
മണി മുഴങ്ങുന്നു
മണല്‍ക്കാട്ടില്‍ .

ഇന്നലെ
കഴിഞ്ഞതാണ്
ചര്‍ച്ചകള്‍
തക്ര്യതിയായി .

ഇന്നിപ്പോള്‍
ഞാനും ,
കുതികാല്‍ വെട്ടികളും
സഖ്യം ചേര്‍ന്നു
പൊതു ശത്രുവിനെ
ഭയന്ന്.

നാളെ പേരറിയാം
ആരൊക്കെയെന്നത്.

ഇതിനിടയില്‍
ഞാനെന്റെ സ്വപ്നത്തെ
തലയിണകീഴില്‍
തിരുകിവെച്ചുറങ്ങും.

നാളെ സ്വപ്നം
ഉപേക്ഷിച്ചു
പോകുന്നാവേളയില്‍
നിങ്ങള്‍ വന്നതിനെ
വീതിച്ചെടുത്തു കൊള്‍ക.

എന്റെ ഭാവി
വിറങ്ങലിച്ച് ,
വിതുമ്പി
തൊഴു കൈയാല്‍
ഇരിക്കുന്നൂഴവും കാത്താ-
ടേബിളില്‍....

ശ്രീഗിരീഷ് പുത്തന്‍ഞ്ചേരിക്ക് ആദരാഞ്ജലികള്‍

2010-02-10T22:54:00.006+04:00

മലയാള സിനിമ ലോകത്തിനു്‌ നല്ല ഗാനങ്ങള്‍ പകര്‍ന്നു തന്ന ശ്രീ: ഗിരീഷ് പുത്തന്‍ഞ്ചേരി കാലയവനികയ്ക്കുള്ളില്‍ മറഞ്ഞെങ്കിലും മലയാളിയുടെ മനസിലെന്നും ഗാനങ്ങളിലൂടെ അദ്ദേഹം ജീവിക്കും .

അദ്ദേഹത്തിന്റെ ആത്മാവിനു്‌ നിത്യശാന്തി നേരുന്നു .

കോണി

2010-01-22T14:35:00.004+04:00

ഞാനൊരു കോണിയാണു്‌ ;

ഉച്ചനാശാരിയുടെ കരവിരുതേറ്റ
കോണി .
പൈതൃകമായി കിട്ടിയ
സത്യം വഹിച്ചു പോകും
ധമനികളുണ്ടെന്നില്‍.
കാര്യ സാദ്ധ്യത്തിനായ് ,
അസത്യ , ചതിയുടെ
ചുവടുകള്‍ വെച്ച്
ചിലര്‍ ചവിട്ടി കയാറാനെന്റെ
ചുമല്‍ ഉപയോഗിച്ചു .

വ്യത്യസ്ത രക്തങ്ങള്‍
ഒരാളില്‍ കേന്ദ്രീകരിക്കുന്നതിനാല്‍
പിതാവിന്റെ പേര്
പതിക്കാന്‍ കോശങ്ങള്‍ക്കായില്ല...

നല്ല ഭാവിയുള്ളയീ കൂട്ടര്‍
വ്യത്യസ്ഥ കസേരകളില്‍
വിഹരിക്കും .

ഒടുവില്‍ ,
യജമാനന്‍ വലിച്ചു താഴെക്കിട്ടപ്പോള്‍
ഇറങ്ങാന്‍ എന്റെ മുതുക് വേണ്ടി വന്നില്ല.
വീണ വീഴ്ചയില്‍ കിടക്കുന്നവര്‍
ഇനിയും നിവരാതെ...

ഞാനീ പാതി വെള്ള പൂശിയ
ചെങ്കല്‍ ചുമരില്‍
ചാരി നില്‍പ്പുണ്ടിപ്പോഴും
നിസഹായതയുടെ ബിംബം തീര്‍ത്ത്.....

നിലാവ് പോലെ.....

2010-01-16T11:08:00.003+04:00

ദൂരം

2010-01-12T21:48:00.003+04:00

'നന്ദി' -എന്നത്

ദ്വയാക്ഷരം .
'നെറികേട് '-അതിന്റെ -
യിരട്ടിപ്പും .
ഉപചാര പദത്തില്‍
നിന്നും
മോദം പൊഴിഞ്ഞടര്‍ന്ന്
നെറികേടിലെത്താ-
നെത്ര ദൂരമെന്നറിയാതെ ,
ഞാനീ കവിത
ചുവട്ടില്‍ ഇരുന്നോട്ടേ..
മറ്റൊരു ബുദ്ധനാവാന്‍....!

പ്രതികരണശേഷി

2010-01-04T23:19:00.000+04:00

ഒരീര്‍ക്കിലിയെന്റെ-

യാസനത്തില്‍
കയറ്റിയപ്പോള്‍
കമാന്നൊരക്ഷരം
മിണ്ടിയില്ല.
പിന്നെ ,
ആപ്പ് അടിച്ചു കയറ്റി
അപ്പോഴുമൊന്നും പറഞ്ഞില്ല.
പിന്നെ ,
മടലായ്,
അപ്പോഴുമൊന്നുമുരിയാടിയില്ല.
ഒടുവില്‍ ,
ഒരു തെങ്ങിന്‍ കുറ്റി
ഓര്‍ക്കപുറത്ത്
തള്ളി കയറ്റിയപ്പോള്‍ ,
സഹിക്കവയ്യാതെ
പ്രതികരിച്ചപ്പോള്‍
പ്രതികരണശേഷിയെ
തെങ്ങിന്‍കുറ്റി വിഴുങ്ങി കളഞ്ഞു..

പ്രണയം

2009-12-22T17:50:00.002+04:00

അച്ഛന്‍

2009-12-15T21:18:00.006+04:00

അവള്‍

2009-12-11T10:35:00.001+04:00

നിന്നോട് ചോദിക്കാതെ-

യാണു്‌ പ്രണയിച്ചത് ;
പറയാതെയാണ്
പടിയിറങ്ങി പോയതും.
ഇടവേളയില്‍
പ്രവാസ തോണിയില്‍
പാഴ് ചിന്തതന്‍
പങ്കായമെറിഞ്ഞതെന്റെ തെറ്റ്.
നാട്ടു നടപ്പിന്റെ പാതയില്‍
പാഴ്ശ്രമത്തിനായൊന്നു പോയി നോക്കി
ആട്ടിയിറക്കി വിട്ടവള്‍ തന്‍
താതനെന്നെയാ മുറ്റത്തു നിന്നും
ആത്മാക്കു ചുറ്റും
തഷ്വം വിതറുന്നച്ഛന്‍
വാക്കിന്‍ ദീപേഷികയുരച്ചെന്റെ-
യാത്മാവിലെറിഞ്ഞു

തഷ്വം പുകഞ്ഞു
തകം മുറിഞ്ഞു

ഹ്ര്യശ്ചൂലയാല്‍ നീറും
മനസിന്
സാന്ദ്വനമായെത്തിയെന്റെ
തനുവേച്ചിതന്‍ SMS :
'ഒന്നിനും പിറകെയോടരുത് ;
നമ്മുക്കത് കിട്ടില്ല.
ഹ്ര്യദ്യമാ വാണി താലോലിച്ച് ,
റെഡ് ഹോഴ്സിന്റെപതയുന്ന
ലഹരി നുണയവേ ,
ഗസല്‍ നിലാവ് വെളുക്കേ ചിരിച്ചു
മറു ചിരിക്കായ് നിനച്ചെഴു-
ന്നേല്ക്കും മുമ്പേ ,
ലഹരിതന്‍ വെള്ളച്ചാട്ടം
പ്രവഹിച്ചു വലപോലെ പുറത്തേക്കായ്...
അതില്‍ കണ്ടു ഞാന്‍
പ്രണയം ചിതറി കിടന്നൊരു കാഴ്ച.

മാന്യമിത്രമേ ,
മനസിലെ ഉമിത്തീയണഞ്ഞിട്ടില്ലീപ്പോഴും....

റബ്ബര്‍മരം

2009-12-04T20:07:00.003+04:00

അസ്തിത്വ ദു:ഖം

നെഞ്ചിലേറ്റി
വിതുമ്പുന്നൊരു
മരമുണ്ട് നമുക്ക്.
ആ വിരഹത്തിന്
റബര്‍ മരത്തേക്കാള്‍
പ്രായവും ,
ഇലാസ്തികതയുമുണ്ടാവു-
മൊരു പരമ്പര പോലെ..
ചിരട്ടയെളിയില്‍ വെച്ച്
പാല്‍ ചൊരിയുന്നു നമുക്കായ്..
വെയില്‍ നക്കി തുടച്ച് ,
പലരാല്‍ കൈമറിഞ്ഞ് ,
വലിച്ചു നീട്ടി , ചവിട്ടിയരച്ച്,
അങ്ങനെയങ്ങനെ...
കാവ്യദേവത
പടിയടച്ചു പിണ്ഡം
വെയ്ക്കാന്‍ നിദാനമെന്താവാം..?
ഞാനറിയാത്തൊരു
ചരിത്രമുണ്ടോ കാവ്യദേവതക്ക്
പറയാന്‍..?
ഉണ്ടെങ്കില്‍ സദയം
പൊറുക്കുകയെന്നോട്
തൂലികയാല്‍
ചോദ്യചിഹ്നമിട്ടതിന്..
പരിഷ്കര്‍ത്താവല്ല ഞാന്‍
എങ്കിലും ,
അയിത്തത്തിനെതിരായുള്ള
സമരത്തിനീ കാവ്യം
നാന്ദി കുറിച്ചെങ്കില്‍
ക്ര്യതാര്‍ത്ഥനായി ഞാന്‍ ;
ഒപ്പം റബ്ബര്‍ മരവും !
(Picture Courtesy: Google site)

ക്ഷമാപണം

2009-11-29T18:35:00.000+04:00

മാപ്പ് ചോദിക്കുന്നു ഞാന്‍

മാപ്പര്‍ഹിക്കാത്ത മോഹത്തിന്‍
മരോട്ടി വിളക്കിനു്‌ ദീപേക്ഷികയുരച്ചത്
മണാന്തമാണെന്ന് പറയാതെ വയ്യ !
നമ്മള്‍ തന്‍ സ്നേഹത്തിന്‍ ശ്രീ കോവില്‍
പണിയാനവിടുത്തെ
തനയയെ പാണിഗ്രഹണത്തിനായ്
താല്‍പ്പര്യം ചൊന്നത്
തെറ്റായിരുന്നോ , തനൂജാമ്മേ ?
തര്‍ക്കവി തര്‍ക്കതിന്
തീപ്പൊരി തെറിപ്പിച്ചു നാം
ഒടുവിലകന്നു പോയെന്നില്‍ നിന്നും
ഓര്‍മ്മതന്‍ ചെമ്പകമലരുകളവശേഷിപ്പിച്ച്..
മുത്തു മണി മാലയാം മദനോര്‍മ്മകളെ
ചാര്‍ത്തി ,സെറ്റ് സാരിയുടുത്തു ,
തുളസി കതിര്‍ വെച്ച്
നുണ കുഴി പറയില്‍
വാല്‍സല്യതിന്‍ മലരു്‌ നിറച്ച്
ഒന്നിങ്ങു വരുമോയെന്നരുകില്‍?
മന്‍മനം കൊതിക്കുന്നു.
മണീചം ഒന്നു പുല്‍കാന്‍
മാപ്പെറ്റു പറയാം ഞാന്‍
സാഷ്ടാംഗ വീഴമടിയനവിടുത്തെ
ചരണത്തിന്‍ കീഴിലായ്...
മാപ്പ് ചോദിക്കുന്നു ഞാന്‍ വീണ്ടും
മാപ്പര്‍ഹിക്കാത്ത മോഹത്തിനായ്...

തലക്കെട്ടില്ലാതെ.....

2009-11-27T02:12:00.000+04:00

കഥയും ,കവിതയും കുളിക്കുവനായി ഇറങ്ങി.നദിയിലേക്ക് പോകും വഴിവെട്ടു കല്ലു കൊണ്ടുള്ള ഇറക്കമാണ്..ആദ്യംകഥയിറങ്ങി ,പിന്നാലെ കവിതയും.
ശേഷം പശ്ചിമ ദിക്കിലേക്ക്..വലതു ഭാഗത്തായി ആരോ വലിച്ചെറിഞ്ഞ മുടികൂന കെട്ടുകള്‍. അതിനു ചുറ്റും തളിര്ത്തു പന്തലിച്ചു നില്‍ക്കുന്ന കമ്മ്യുണിസ്റ്റു്‌ പച്ചകള്‍.പരദൂഷണം പറഞ്ഞു പോകുന്ന പ്രാണി കൂട്ടങ്ങള്‍..ഇടതു ഭാഗത്തായാണു്‌ സാക്ഷാല്‍ കശുമാവിന്‍ സാമ്രാജ്യം. അവിടെ വ്രിതിയാല്‍ ആരോ ചതുരം തീര്‍ത്തിരിക്കുന്നു. ഉണങ്ങിയ മലത്തിന്റെ ദുര്‍ഗന്ധം പേറി മന്ദമാരുതന്‍ കറങ്ങുന്നു..കവിതക്ക് ഓക്കാനം വന്നു.കഥ കവിതയുടെ മുതുക് തടവി കൊടുത്തു. ജോലി കഴിഞ്ഞു തളര്‍ന്നു മടങ്ങുന്ന അരുണന്‍ .മാനത്തിന്റെ സിന്തൂര പൊട്ടവര്‍ കണ്ടു. നദികരയിലെത്തിയ അവര്‍ കുളിക്കുവാനായ് തയ്യാറെടുത്തു .കഥ തലക്കെട്ടഴിച്ചു തൊട്ടാവാടി ചെടിയുടെ മുതുകില്‍ വെച്ചു.അവ യഥേഷ്ടം മിഴികളടച്ച് ഭൂമിയെ ചുംബിച്ചുറങ്ങി. കഥ ആദ്യംഇറങ്ങി, പിന്നാലെ കവിതയും . കവിതയുടെ പാദത്തിനു ചുറ്റും വട്ടമിട്ടുവെള്ളീ പൂശിയ പരല്‍ മീനുകള്‍..തിരുവാതിര കളി അനുസ്മരിപ്പിക്കും പോലെ.. കഥ മുങ്ങാം കുഴിയിട്ടു രമിക്കുകയായിരുന്നു..അതേ സമയം , കരയില്‍ തങ്ങളുടെ വീടിനു ചുറ്റും മതില്‍ തീര്‍ക്കുന്ന തിരക്കിലായിരുന്നു കട്ടുറുമ്പിന്‍ കൂട്ടങ്ങള്‍..മണല്‍ ഉരുളകള്‍ അവര്‍വീടിനു ചുറ്റും നിരത്തുന്നു.അപ്പോള്‍ അതു വഴി കടന്നു വന്ന സന്തോഷ് പല്ലഷന തലകെട്ടെടുത്ത് കശു മാവിന്‍ സാമ്രാജ്യത്തിലേക്ക് വലിച്ചെറിഞ്ഞു. രതിയിലേര്‍പ്പെട്ടിരുന്ന രാജിലങ്ങള്‍ ഉന്‍മാദത്തിന്റെ കെട്ടുകളഴിച്ച് കരിയിലകളിലൂടെ ചിലങ്ക കിലുക്കി ഓടി മറഞ്ഞു .കവിത ചെളിയില്‍ ആണ്ടുപോയി. കഥ ഓടി കരക്കു്‌ കയറി നെഞ്ചിടിപ്പോടെ..പിന്നെ, തലകെട്ടന്വേഷിച്ചു. ഇനിയും നിദ്രയില്‍ നിന്നുണര്‍ന്നിട്ടില്ലാത്ത തൊട്ടവാടി ചെടികള്‍ . തന്റെ വ്യക്തിത്വമായ തലകെട്ടും , കാമുകി നഷ്ടപ്പെട്ട വേദനയാലും കഥ വിഷണ്ണനായി തന്റെ യാത്ര തുടരുന്നു...

നിന്റെ കാലടികള്‍ (പരിഭാഷ)

2009-11-14T16:22:00.003+04:00

പാബ്ലോ നെരൂദ
മുഖത്ത് നോക്കാന്‍ കഴിയാത്ത
വേളയില്‍ ഞാന്‍
നിന്റെ പാദത്തിലേക്ക് നോക്കും .
ചെറു വളവുള്ളഅസ്ഥിയുള്ള നിന്‍പാദം,
കരുത്തുറ്റ ചെറുപാദമല്ലോ നിന്റേത്‌.
നെടുംതൂണാണത്‌ നിനക്കെന്നറിയാമെനിക്ക്‌
നിന്റെ മധുരഭാരമവയാല്‍ഉയര്‍ത്തുന്നതും,
നിന്റെയരക്കെട്ടും,വക്ഷസും,
ചുകന്നയിരട്ട മുലക്കണ്ണുകളും,
നിന്റെ കണ്‍കുഴികളൂമൊന്നുപറന്നകന്ന-
കലേക്കായ്‌..
നിന്റെ വിശാലമധുരഭാഷണവും,
ചുവന്ന തലമുടിചുരുളുകളുമെന്റെ
ചെറുഗോപുരമല്ലോ.
എന്നാലോ,ഞാന്‍ ഇഷ്ടപ്പെടുന്നു നിന്‍ കാലടികള്‍
എന്നെ കണ്ടെത്തുംവരെ
ധരക്ക്‌മീതെ,കാറ്റിനു്‌മീതെ,
ജലത്തിനു്‌മീതെയുമതിന്റെ
പാദമുദ്ര പതിഞ്ഞതിനാല്‍മാത്രം!
**********************************
ആംഗലേയം ഇവിടെ വായിക്കാം

ചേട്ടന്‍

2009-11-14T13:54:00.000+04:00

ചേട്ടനെ കാണ്‍മാന്‍

മൈലുകള്‍താണ്ടിയമ്മ-
വീട്ടില്‍ഞാനെത്തിടുമ്പോള്‍
ചേട്ടന്‍കിഷോറിന്റെ
വീട്ടിലുണ്ടെന്നമ്മൂമ്മ
പറഞ്ഞിട്ടു്‌പോയിഞാന-
ങ്ങൊട്ടായ്‌...
പട്ടാളക്യാമ്പിലെകഥകളെല്ലാം
വീര്യാംചോര്‍ന്നുപോവാതെ
ജിഹ്വയാം തോക്കില്‍നിന്നു്‌
വാക്കിന്‍തിരകളുതിര്‍ക്കുന്ന കിഷോര്‍,
യെന്നെ കണ്ടതും
അതിര്‍ത്തിയില്‍കയറിയപരിചിത-
നെന്നപോല്‍
തറപ്പിച്ചൊരു നോട്ടമെറിഞ്ഞെന്റെ
നേര്‍ക്ക്....
പിന്നെ,ചോദിച്ചു ചേട്ടനോടായ് :
'ആരാണതെന്നറിയോ നിനക്കു്‌' ?
അപകര്‍ഷതയാംകുപ്പായംചൂടിയ-
യെന്നെ ചൂണ്ടി പറഞ്ഞുപോല്‍ ചേട്ടന്‍ :
അകന്നേതോ ബന്ധത്തിലുള്ളൊരു
മാമന്റെ മകനാണതെന്നു്‌മാത്രറിയാം'
ക്ഷിപ്രംമനസിന്‍ഇരുട്ടറ ഭേദിച്ചു്‌
സങ്കടമെന്ന പഴമുത്തശി
വദനമാംപടിപ്പുര ലക്ഷ്യമിട്ടു്‌
പായുംമുന്പേ,യവിടംക്രിത്രിമ
പുഞ്ചിരികയറിയിരുന്നു.
തിരിഞ്ഞു നടന്നു ഞാന്‍
ലജ്ജയുടെ,ദുഃഖത്തിന്റെ
കുട്ടകള്‍പേറി.....
നടന്നു പോകുംവഴിയിലതാ
ആലയിലായ്‌പ്രഭാകരേട്ടന്‍
തീകൂട്ടുന്നു....
പഴയോല നൂണ്ട്‌പുറത്തേക്കു്‌പായും
പുക പടലങ്ങള്‍എന്നെ നോക്കി ചിരിക്കുന്നു.
എന്നെ മാത്രംനോക്കി ചിരിക്കുന്നു..
* **********************************
അമ്മ വീട്ടില്‍നിന്നും തിരിക്കുമ്പോ-
ളൊരു സ്വകാര്യംപറഞ്ഞേട്ടനിപ്രകാരം :
'ആരു ചോദിച്ചാലുമങ്ങനെ പറയാവൂ നീയും'
'ശരി'-യെന്നുമൂളി ഞാനും
സമ്മതത്തിന്റെ പര്യായമെന്നോണം
(ചിരി അപ്പോഴും സങ്കടത്തിനു്‌ മീതെ.....)
കാലംകടന്നു്‌പോയി
മാറ്റങ്ങള്‍ വിതറി......
എന്നാല്‍,മാറ്റമില്ലാത്തൊരു
ശിലാ സമസ്യ നെഞ്ചെരിച്ചിലിന്റെ നാട്ടില്‍
മനസിന്റെ മുറ്റത്തായ്‌
വിഷാദത്തിന്റെ ചോദ്യ ചിഹ്നം തീര്‍ത്ത്‌,
താടി വളര്‍ത്തി വളഞ്ഞുകൂടി
നില്‍പ്പുണ്ടിപ്പോഴും
ഉരിയാടാത്ത മാധവേട്ടനെ പോലെ.......
**************************************
എഴുത്ത് മാഗസിനില്‍ പ്രസീദ്ധികരിച്ചത്

ദൈവം

2009-11-14T01:57:00.000+04:00

'ദൈവം' -എന്ന
ദ്വയാക്ഷരത്തില്‍
പ്രപഞ്ചം ഒളിഞ്ഞിരിപ്പൂ ;
ആരും കാണുന്നില്ലെങ്കിലും !
ആപത്ത് വരുമ്പോള്‍ ,
പ്രതിയോഗി കരുത്തനെങ്കിലും ,
നിരീശ്വര വാദിയാണെങ്കില്‍പോലു-
മവസാനം പറയും :
'ഒക്കെ ദൈവം കാണുന്നുണ്ടെന്ന്...'
അപ്പോളൊരു ചെറു പുഞ്ചിരിയാ-
വിശുദ്ധവദനത്തില്‍ തെളിയും
നമ്മില്‍ നിന്ന് ഇച്ഛിച്ചത്
കേട്ട നിര്‍വ്ര്യതിയാല്‍ !

എന്തിനായിരുന്നു ..?

2009-11-12T23:32:00.001+04:00

ഞാന്‍ താപ്തിയെ
പ്രണയിച്ചത്
അമ്മയോടുള്ള ആരാധന
കൊണ്ട് മാത്രം!
വേവാത്ത പ്രണയ കഷണം
മനസില്‍ ചുഴിയില്‍
ദിക്കറിയാതെ കറങ്ങുന്നു ...
ചിന്തകള്‍
ആവികളായി
മുടികള്‍
ദേശം വിട്ടിറങ്ങി
തിരിച്ചു വരില്ലെന്ന
പ്രതിജ്ഞയോടെ ...
കാലം കറങ്ങി
കണ്ടിട്ടും കാണാതെ
തിരക്കിന്റെ ദേശത്തേക്ക്
ഞാനും പോയി ...
പ്രണയം,
പേരറിയാത്ത ദിക്കും തേടി
മറഞ്ഞു.
ഇന്നിപ്പോള്‍
ചോദിച്ചു പോകുന്നു:
'എന്തിനായിരുന്നു -
ഞാനവളെ പ്രണയിച്ചത് ..?
ആ തമാശ തന്‍
ലക്ഷ്യം, എന്തായിരിക്കാം..?
************************
e-പത്രത്തില്‍ പ്രസീദ്ധികരിച്ചത്

മുന്‍കരുതല്‍

2009-11-07T07:05:00.002+04:00

(Courtesy: Google)

അന്നൊരു വ്യാഴാഴ്ച്ചയില്‍
ദിനത്തിന്റെ പൊക്കിള്‍ ലക്ഷ്യമാക്കി
സമയം കിതച്ചെത്തിയ നേരം
അച്ഛന്‍ തെങ്ങില്‍ കയറാന്‍
തയ്യാറെടുക്കവേ,
പതിവില്ലാകാഴ്ച്ചതന്‍
കൌതുകം നോക്കിയീയുള്ളോന്‍
തെങ്ങിനരുകിലായ് വന്നു നിന്നു
തലേന്നു പെയ്ത മഴ
തീര്‍ത്ത ദേഹം
പച്ച കുപ്പായമണിഞ്ഞു നില്‍ക്കേ,
അച്ഛന്‍കയറുന്നു
വഴുക്കല്‍ വക വെക്കാതെ
നെഞ്ജുരച്ച് ...
ചൂട്ടുകള്‍ ,കൊതുമ്പുകള്‍
വലിച്ചു താഴെക്കിടുന്നച്ഛന്‍
പിരാകി കൊണ്ടോടുന്ന
ഉറുമ്പിന്‍ നിവാസികളെ
കണ്ടില്ലെന്നു നടിച്ചുവോ?
താഴെയിറങ്ങിയച്ഛന്‍
കൊതുമ്പുകളെല്ലാം
കൂട്ടികെട്ടിയടുക്കി വക്കുന്നു
കൂരതന്‍ മൂലയിലായ് ...
കുളിച്ചു ,തൊഴുതു, കുറി വരച്ചു-
വന്നച്ചന്‍
അമ്മ നല്‍കിയ തണുത്ത
പുട്ടും, കടലയും ആര്‍ത്തി-
യോടെ കഴിക്കുന്ന കാഴ്ച്ച നോക്കി
യമ്മ നിന്നത്‌
ഉച്ചനാശാരി കര വിരുത്
തീര്‍ത്ത കട്ടിള പടിയില്‍ !
ജോലിക്കായ് മടങ്ങുമ്പോള്‍
യാത്ര പറയാറുള്ളാ പതിവും
തെറ്റിച്ചു..
സൈക്കിള്‍ നീങ്ങിയച്ഛനെ
മുതുകിലേറ്റി
വളവും കഴിഞ്ഞങ്ങു്‌
അകന്നു പോയി....
വൈകിയാണെങ്കിലും
അച്ചന്‍ തിരിച്ചെത്തി
വെള്ളയില്‍ പൊതിഞ്ഞാണെന്നു മാത്രം !
ആളുകളങ്ങിങ്ങു ഒത്തു കൂടി
അലമുറകളെങ്ങും ഉയര്‍ന്നു പൊങ്ങി
സങ്കട ചുഴിയില്‍ വീണ മുറ്റം
വീടിന്റെ യിരുണ്ടേതോ മൂലയില്‍
കുനിഞ്ഞിരുന്നു കരയുന്ന-
യെന്റെ കര്‍ണ്ണത്തിലേക്ക്
മാവ് വെട്ടുന്ന ശബ്ദമെത്തവേ,
ആരോ തുരുതുരെ ചുംമ്പിച്ചു
ചൊല്ലിടുന്നു :
'മോനെ ..നടക്കെടാ.. ,അച്ഛനെ
കാണണ്ടെ...?
ഒട്ടും തളരുത് ..എന്റെ കുട്ടന്‍.. '
ബോധം തളര്‍ന്നുപോയ നേരത്ത്‌
ആരോ വലിച്ചു നടത്തിച്ചീടുന്നു ;
ജനക്കൂട്ടത്തെ വകഞ്ഞു മാറ്റി
അതാ കിടക്കുന്നച്ഛന്‍
വെള്ളയില്‍ പുതച്ച് നിശ്ചലനായ് ...
കണ്ണീര്‍ തീര്‍ത്ത പുഴയാല്‍
കാഴ്ച്ചകള്‍ മങ്ങിയെ കണ്ടതുള്ളൂ...
സൂക്ഷിച്ചു..സൂക്ഷിച്ചു നോക്കുമ്പോള-
തായച്ഛന്റെ വദനം കണ്ടില്ല
ഞാനവിടെ..
ചിതറി തെറിച്ച വദനം
ചേര്‍ക്കാന്‍ പാടുപ്പെട്ടത്രെ
ഡോക്ടര്‍മാരും....
മാക്ടവല്‍ വിസ്കി കടത്തിപോയ
ലോറിതന്‍ വിധിയുടെ
ചക്രത്താലെന്നു
പിന്നീട് കേട്ട കഥയാണു്‌ കൂട്ടരെ..
അച്ഛന്റെ പട്ടടയൊരുങ്ങുന്നു
വടക്കിനിയില്‍ കുളത്തിനരുകിലായ് ;
തെക്കോട്ട് വെയ്ക്കാന്‍ സ്ഥലമില്ലാത്തതിനാല്‍ !
ഈറന്‍ തുണിയുടുത്തച്ഛ-
ന്റെ പട്ടടക്ക് തീ കൊളുത്താന്‍
ഞാന്‍ പിടിച്ച കൊതുമ്പിന്‍ കെട്ടുകള്‍
അച്ഛന്‍ കരുതി വെച്ചതായിരുന്നു...
അച്ഛന്‍ കരുതി വെച്ചതായിരുന്നു...

അന്ധവിശ്വാസം

2009-10-26T06:43:00.000+04:00

അന്ധതയുടെ താഴ്വരയില്‍ ജനിച്ച് തിമിരം ബാധിച്ച ജനങ്ങളിലൂടെ വിശ്വാസത്തെ കൂട്ടുപിടിച്ച് ആധുനികതയുടെ വാതായനം കടന്ന്‌ ,ഉത്തരാധുനികതയിലൂടെ ജൈത്ര യാത്ര തുടരുന്നു....

വിചാരണയുടെ നാളുകള്‍ വിദൂരത്തല്ല ; അവിടെ നമ്മുക്ക്‌ സംവദിക്കാം !

അവഗണന

2009-10-24T21:46:00.000+04:00

അവന്‍ അതീവ ദു:ഖിതനാണു്‌.ഹ്ര്യദയവേദന പറഞ്ഞറിയിക്കാന്‍ പറ്റാത്തത്ര ഉള്ളിലുണ്ടു്‌. താന്‍പ്രണയിച്ച പ്രണയിനിയെ നഷ്ട്ടപ്പെട്ടതിലല്ലാ, കവിതയെ ഭോഗിച്ചു ഭോഗിച്ചു ഇതുവരേയും ഒരു കുഞ്ഞു പിറക്കാത്തതില്‍.

പിറന്നതൊക്കെയും ബുദ്ധിജീവികള്‍ ചാപിള്ളയെന്നു മുദ്രകുത്തി മേശക്കു കീഴിലെ അമ്മ തൊട്ടിലിലേക്കു്‌ വലിച്ചെറിയുകയായിരുന്നു..കണ്‍മഷിയില്ലാതെയവര്‍ ചുരുണ്ടുകിടക്കുന്നു;കഥയറിയാതെ.....

അതേസമയം,അവന്‍ അവഗണനയുടെ കൈയ്പ്പ്നീരും പേറി വീണ്ടും ഭോഗിക്കുന്നു.....സര്‍ഗവേദനയോടെ.....

ജീവിത മാസങ്ങള്‍

2009-10-24T21:26:00.000+04:00

ജനുവരിയില്‍

ജനനം.

ഫെബ്രുവരിയില്‍

പ്രണയം.

മാര്‍ച്ചില്‍

വിടവാങ്ങുന്നു...

ഏപ്രിലില്‍

വിഡ്ഢിത്തമോര്‍ത്ത്‌ ചിരിക്കാം!

മേയില്‍

ജീവിത മേച്ചില്‍ പുറങ്ങളിലൂടെ

തമാശതന്‍ ലക്ഷ്യം തേടി

യാത്ര തുടരാം....

ഞാന്‍

2009-10-24T16:40:00.001+04:00

മുണ്ഡനം ചെയ്യിക്കില്ലെന്‍ശിരസ്സ്
കാരണംകവിതയുടെ
ഗര്ഭകോശംതലയിലാണ്
താടി വടിക്കാറില്ല;
വിരഹത്തിന്‍
വിത്തുകള്‍
കിളിര്‍ക്കുന്ന കേദാരമണവിടം.
ധരിക്കാറില്ല പാദരക്ഷ ഞാന്‍
പാദവും ധരണിയുംതമ്മിലുള്ള
പൊക്കിള്‍ക്കൊടി ബന്ധം
വിച്ഛേദിക്കാതിരിക്കാന്‍.
ധരയുടെ വിലാപങ്ങള്‍ക്ക്
പാദം കാതോര്‍ക്കുന്നത്
ഞാനറിയുന്നു....
മാലോകര്‍ ചോദിക്കുന്നു:
'കുട്ടാ, എന്താ എങ്ങനെ?
പുന:ഞാനെന്നോട്‌ ചോദിച്ചു:
എന്‍മനം സ്വകാര്യമായി
മന്ത്രിച്ചതു്‌
ഇങ്ങനെയൊന്നുമല്ലെങ്കില്‍
നീ എന്ന നീ ഇല്ലെന്ന്‌ '
ഇനി ഞാന്‍ എന്തു പറയാന്‍!

അവഗണന

2009-10-23T12:29:00.000+04:00

നിന്നെ സ്നേഹിച്ച
കുറ്റത്തിനാണു്‌
നീയെന്നെ ഒറ്റുകൊടുത്തതു്‌.
മുപ്പത് വെള്ളികാശിനല്ല;
പദവിക്കു്‌വേണ്ടിമാത്രം!
നീ ഉയരങ്ങള്‍
കീഴടക്കുന്ന തിരക്കിലായിരുന്നു...
ഞാനപ്പോഴും
സത്യത്തിന്റെ ചൂട്ടുപിടിച്ചു്‌
മുന്നോട്ടു പോയി
എന്നെ തേടി പദവികള്‍
വന്നില്ല
കൂട്ടുകാര്‍ വന്നില്ല.
അവഗണനയുടെ
കയ്പ്പുനീരുംകുടിച്ചിങ്ങനെ-
യെത്ര നാള്‍?

പ്രവാസി

2009-10-22T23:18:00.000+04:00

ഞാനാംമെഴുകുതിരി
ഉരുകുന്നു,യാരോ
കൊളുത്തിയദീപേഷികയാല്‍!
സ്വയമുരുകുമ്പോഴും
ബന്ധുരര്‍ക്ക്
സന്തോഷ നാളങ്ങള്‍
ചൊരിയുന്നു...
ഉരുകിയുരുകി
ജീവിത പലകയില്‍
ചേര്‍ന്നമരുമ്പോള്‍
സ്നേഹംകൂടിയയൊരാള്‍
എന്നെയെടുത്ത്
ഒറ്റപ്പെടുത്തലിന്റെ
തമസിലെറിയും